Abou l'assoustament de l'E.P.T. e de l'ESCOLO DÒU PO, la PRO SAN PEIRE a tengu lou « 2° COUNCOURS DE POUESÌO PROUVENÇALO ».

   La manifestacioun, accoumpagnado per uno enteressanto espousicioun de artisanat varachenc  -dal moble rustic ai gances picoutina de Blins al fèrre pica à la man ai séie e burrières- s'es serra lou 10 e lou 11 de jun abou la premiacioun.

   Coumo l'an derrìe, la jurìo a triha li uéch coumpousicioun le mai valentes; sus eles lou sero dal 10, sande, dins lou tiatre parrouquiàl de San Pèire i present a vouta, per destouschar lou primìe e tuchi i auti en avenént. Vaqui i resulta:

 

1° prèmi - «LA JAI » de Ines Cavalcanti de l'Elvo

2° premi « SOUT DI LAMPIOUN», de Tavio Cosio dal Mèel
3° premi - « DONDO MARTINO », de Tavio Cosio dal Mèel
4° prèmi - « SE FESSE REN...», de Maria Piera Rosso de la Coumboscuro

5° prèmi - «QUOURO LOU SERO » de Ines Cavalcanti de l'Elvo

6° prèmi « AURO E LUNO», de Franco Bronzat de Viarét Clusoun

7° premi - « GENT DE MOUNTAGNO », de Lucia Abello de Tuchàles, v. Mairo

8° prèmi - « OURO E APRÈ », de Jan Pèire de Bousquìer

 

CATEGOURIO SOUT DI 15 AN

1° prèmi - « VARACHO, VARACHO...», de Adelma Ruggero, dal Mèel

2° prèmi - « ME CUENTAVES », de Pauléto de la Méiro de la Coumboscuro

3° prèmi - « DEMAN », de Mauro de Pracistèl de la Coumboscuro

4°  prèmi -  « VOUS DE MA GENT », de Annéto de la Nebiéto de la Coumboscuro

5° prèmi - « GENT -DE  MOUNTAGNO », de Adelma Ruggero dal Mèel

 

   Bèn que envertouia un pau à la viteço en causo di retard pourta per i eleicioun poulitiques de mai e dal desdraiament de l'oupinioun publìco que nes segui, lou Councours a agu un boun numre de participant. La qualita di pouesìes, bèn que rèn al nivel lou meiour, ero pourtàn aquelo de la  retrouba e aima civilisacioun prouvençalo; pouesìo zounsouna e poussa d'un founs de souffranço e de lucho.

   I ourè quarcarenéto à dir d'aquesto garo de pouesìo: la toco es bono e i gent ié prénen part per vìo que soun souna à voutar pouesies que ié agràden. Acò es uno jolio e sano obro de espandiment di valour pouetiques que vai encouraja e ié dounén touto nosto aprouvacioun.

  Me, justament, e la pouesìo? Es élo que - pa prou de s'en-anar « nudo e pauréto», coumo di lou pouèto ancian - risco de ié laissar toutalament i os e lou sanc. D'acò nous es pareissu quarcarèn ent'aquesto oucasioun, ente i valour de trasfiguracioun e de emoucioun lirìco soun un  pau toumba dins l'aigo. Me es justament sus acò que, per valourisar coumo se merìto, enchariho pourtar al councours i chanjament necessari.