Uno vesprado de magnifìco frairanço entra valades prouvençales es esta aquelo de sande, 24 da mars, que "Coumboscuro" a presenta, dins la salo dal teatre parrouquiàl, la pièço dramatìco "LOU MAL", de Sergio Arneodo, dran d'un publi de fraire de lengo espés e mai que mai enteressa à l'espetacle. (Recourdén que l'an passa i aviho presenta uno autro pieço: "An vendu le terro").

   Encaro un bot lou lounq dal dramo es ressouna amounitour lou bram "La terro se vend jamai...jamai!"

   L'apassiounanto aventuro de l'aut vilage di Quiòt, menaça da i especulatour di coundoumeni e di super-estacioun esqui, es bèn lou simbòle d'un destin que soutourarè touto nosto mountagno, se la gent prouvençalo di valades se n'en paro rèn abou toute i soues forces.

   I Quiòt, cerca, desputa, abrasama da i gruès arlèri de la finanço e dal carrierisme pouliti senço couscienço, à la fin finalo brùsen.   La destrucioun es purificacioun. Lou fuèq lavo i discordies interioures e i malicies vourpines e enteressa de i especulatour. Es la derriero rebelioun d'un mounde miraclousament soubrevivu dins sa fè anciano countro uno soucieta crudelament e avidament calcoulatouro e materialisto.

   Après de "Lou mal" i jouve de l'Uvernànt (ente i-a uno Pro-loco finalament sensiblo à la civilisacioun autoctono: n'avén deja parla sus lou n.46 dal journal) an presenta i poulides dances tradiciounales dal vilage, d'un gaubi aviou, lèst e estrambourdant.

   Coumboscuro a fach frairanço em'èli abou i soue dances. BRAVE li jouves da l'Uvernànt! Tenè-vous fidèl à l'amo prouvençalo de vosto gent. Recourdè lou bram de "Lou Mal": LA TERRO DI REIRE SE VEND JAMAI! E "OSCo" A LA FRAIRANCO ENTRA I NUESTE VALADES!