La « Rocho de l'Estello » es uno bello mountanho de la Coumboscuro: dentourn a de biéi pra, que la primo se vièsten de vioulettes jaunes e l'ista l'erbo de cervìn douno uno bono pasturo e de bon fen per li besties. Aquisti pra soun:
li Jounches, l'Arpiòlo, lou Bequét. Niage avihen tuchi, per banhar la terro, dins li mes de secaréço, de bialeres que pourtàven l'aigo.
I aviho uno grosso sourço amoun, bèn al mès dal Bas de l'Aut (un'autro mountanho un pau mai enlài de Rocho de l'Estello) e li patroun di pra pihaven aquesto aigo, per bialàr.
Ma, coumo arubo souvènt 'bou li causes de mita, aquesto gent anavo rèn d'acordi, perqué qui vouliho trop d'aigo, qui vouliho bialàr lour pourn, qui la nuéch, e 'm'acò tuchi li ista amoun, al caus de la Rocho de l'Estello, i aviho de ruses e de marrìes paraules.
Uno bello nuéch uno fremo, sagrina que per un pau d'aigo sa gent fasiho rèn que letigàr, a près uno grosso tissoùn de lano e s'es enchamina vers lou bas de l'Aut.
«'Bou aquesto tissoùn estoupou lou pertus de la sourso, e 'm'acò saren tuchi countent. Miéi istàr senço aigo, que vèire la nostro gent se rusàr coumo de servages!».
La lano, ben chaucha dins la tèrro banha, a pougu ensuhàr la sourso ma l'aigo a garba sout la terro e es venguho à sahir mai basso, al soum de l'Arpiòlo e un autre pau (paréi disihen li viéis) es sahi de l'autre caire de la mountanho, à Paraloup, en val d'Esturo.
D'alouro lou nostre biàl, que calo de l'Arpiòlo, ié dihen, per recourdàr la tissoùn de lano: «LOU COUMBAL TISSAN »
commenta