franco-provenzale

La poouvra fumela i eret istà trafita da un dli corn dla cuna, coun dins l’ultim nà. Forse i eret an camin qui i dounavet lou lait o forse i avit sercà ad salvalou… Lou barba Batista ou ieret restà sop par lou coungelamant ripourtà. Min pari ou ist varì ma ou restà senhà par touta la vita. Però ou l’avìt voulu ricoustruì la ca ant l’istes post. Arcordou que onhi bot que la né i quarsit, ou chezit an preda a l’agitasioun é ou fazit alà touti ant ‘ou bou, l’unic post dla ca qu’ì ieret nhint croulà. Nous ì dizian: “Ma, Pari, perqué ou l’es coustruì la ca prope isì?” È quial ou rispoundit que ounhun ou l’avit soun destin, ounhun li souè post”. An sitta ca, propi souta al roches dl’ Euvyi ‘d Moundroun, Couintino ou l’avit trascourù l’infansi é la prima djouvinassi. Mentre li frari più grant ou i eroun apasiounà ‘d cassa, alpinizm è shiatoù, quial finì la journà ad travai ou preferìt dedicase a la letura é a la muzica. Purtrop ou l’avìt nhint fait a tens a amparà tan’ daou pari, lou maestro dla banda muzical, cou i eret mort can’ che quial ou i eret ancour quitì. Ou i eret dla stesa leva dou re Vittorio Emanuele, ou ricourdavet Couintino. Ma an Barmës an sai an, oltre a la banda muzical, i avit ancoura tanti cou sounavount lh’estrumant tradisiounal a corda, lou vioulin, la bassi é lou mandoulin. Ou i erount muzicant cou l’avìount amparà a sounà a oureìi, cou s’ tramandavount li moutìou da ‘na generasioun a l’aouta. Carcun ad lour ou ist ancoù ricourdà par lou soupranoum merità par lou strumant prefer, coume “Quitara”, coume “Paganini”. È ancoura “Riga”, “Chesquin”, “Peroulin ‘d Prat”. Couintino ou li arcourdavet touti, d’ounhun ou chitavet n’epizodi.

Lou soun maestro e i eret, però, Angelo Barbisin, dit Nangel, om ad tantes inisiativës é inteligensi: gouida, sindic, ufichal poustal, ma ad co cronista da storia dou post é genealogica, fotografo é zviloupatoù ad fotografiës, respounsabil dl’ouservatori metereologic. Nangel ou l’avìt moustrà a Couintino a sounà lou vioulin é d’aouti strumant, ma più ad tout ou l’avìt trazmatù tout an patrimoni ad muziquës tradisiounal proubabilmant coumpostes slou post o coumouncouë aruvàies an tens ormai lounh. Co quial ou ieret mort realivamant jououn strouncà da an maloù a la Mussa, mentre an pien invern, ou i eret ampenhà coun d’aouti dou post a pourtà perës coun la lìa. Couintino ou l’avit mac ses ans, ma ou l’à cuìi lou testimoni é ou i at ancaminà a sounà sia ant la banda, andoua cou ist vinù maestro ant i an souchesìou, sia ant ‘ou group poupoularsco, coumpounù da barménc cou indousavount lou coustum tradisiounal é ou sounavount muziquës tradisiounal, ou sounavout da strumant a corda. Ou sount lh’an più beli par li joun dou pais; ant i viei café ad Bàrmes, ès counservet al foto dou grup barménc an gir par al valadës, ma ad co par l’Italia.

È vint la gouera, lh’an difichil par lou pais, più ad tout lh’ultim meis, cant ant la val è divampet la gouera chivil é li pais ou divienhount tera ad nhun, lou post ad raprezalhës é vendicatìou ad sanc. Ant i an suchesiou, dopou l’eouforia dla pas, co Couitino coun la fumela Eougenia ou l’at da achetà, coume tanti d’aoutri barménc dla soua generasioun, la vìi doulourouza dl’emigrasioun. A Turin iat lou travai que an Bàrmes ou s’ tròvet nhint, ma lou pansé ou restet legà aou pais quitì é la soua coultura é la soua tradisioun. Touti li disandou at seira ou piet lou treno vé la coriera par tinì ansembiou la banda muzical dou pais, ma al delouzioun ou sount tantes é poques al soudisfasioun, parqué li tens ou sount cambià é lh’efèt dl’emigrasioun é dlou spoupoulamant ou s’ fant sintri.

E ancaminet par Bàrmes an lounc tens at declin. Ant ‘ou gir ad poqui an l’inter moudel ‘d coultura loucal, que par secoul ou s’avit rinouvà an maneri lenta é gradoual mantinant propi la propria identità, ou intret amprouvizamant an crizi, sensa que d’aoutri moudel praticabil ou n’arpìeunt lou post. La banda i sa shoulhet, li muzicant, un dopou l’aoutou, ou quitount ad sounà. Li strumant ou restount abandounà ant una soùffia. Ma Couintino, resta cazi soul a counservà lou arcort dou pasà, ou s’ laset nhint pìia da lou sconfort é ou countinouet a fari muzica, a coumpounri, scriri poueziës an patouà.

Finalmant, a la fin di an sesanta, ad propria inisiativa, ant in moumant ad coumplet dizinteres par sittës chozës nhint mac ant al Val ad Lans ma ad co d’aoutres part, ou dechidet ad lasìa comounque ‘na testimouniansi ad coumë que ès sounavet ant la soua jouvinassi. Coun l’adjut ad duì registratoù, ou ezegouet prima la meloudia coun lou vioulin é pe l’acoumpanhamant coun la quitara é dopou tanti tentatìou ou rieset a efetouà tantës registrasioun ad muzica ad la più aoutentica tradisioun barmenchi. Couintino ant in prim moumant ou voout nhint divulgà sittës registrasioun par la moudestia é la rizervatassi, carqui bot fina echesiva, cou soun propriës ad li veri mountanhin é co par lou timoù, par aoutou justificà, que d’aoutri ou s’ampadrouneount ad sittës muziquës é ou l’prezenteount coume souës, nhint diversamant da san que ieret avinù par d’aoutri aspet ouriginal dou patrimoni coultural ad Bàrmes.

Lh’an stanta, outanta ou pasount sensa que tout sit presious documant ou vineiet fora da ‘na ristreta cherquia d’apasiounà dal tradisioun barmenchës, fin cant, coun la fourtuna tra li jououn dla muzica etnica (é zl’ounda ad salla ouchitana an particoular) ou soun tanti a chamà que sittës muziquës, tra li poqui documant cou polount riferise coun certassi a l’area francoprouvensal, ou séount valourizaies coume ou meritoun. Ma è vintet trouà al garansiës qu’es trateit d’ n’ouperasioun sensa fin ad lucrou, couretamamant documentà, qu’ i salvagouardeiet l’apartenensi é la titoularità dal registrasioun.

Couintino ou vòou co que ‘l souës muziquës ou resteoun patrimoni di barménc o almeno ad sai cou s’arcounheisount ant la coultura dou pais. Dopou an ad deluzioun lou mesajou ad Couintino ou vint cuì. A la fin ad lh’an nouanta ès costitouet an maneri anfourmal an grup ad persounës cou l’ant a queur la tradiosioun ad Bàrmes. Tra sittës ‘na joun vilejanta, Elisabetta Zanellato, is laoureet brilantemant a l’Università ad Turin, i discutet ‘na tezi zl’identità loucalë atravers l’espresioun muzical dal Val ad Lans, qu’ i fai riferimant propi aou travai ad Couintino. Carqui an dopou la richerca ì vin amplià é publicà da la “Società Storica delle Valli di Lanzo” ansembiou an compat disc dou prestijous grup tradisiounal “Li Barménk” cou riproudùet al muziquës salvaiës da l’esi dëzmentiaiës grasië a lou travai ‘d Couintino. Bàrmes ou vint an pouint ad riferimant par sai qu’ i piait la muzica etnica é la coultura francoprouvensal. Lou maestro Couintino da tanti an ou pouìt pint sounà o vinì an Bàrmes: l’età é li proublema ad salutë ou lou tratenhun ant la soua ca ad Turin, andooua cou trascourit al journaiës a scoutà la muzica é a arcourdà. La soua mant ancoura luchidisima ì vivit ant l’imaginë da quial fisà par sempre ant una belisima pouezia: lou soun pais ancastounà tr’al rochës, a li tens più beli can li joun ad Barmës ou s’trouaount a sounà é a balà zla tera batua d’un curtil que a lour ou lh’aparit coume ‘na splendida sala da bal…