franco-provenzale

A la fin dou brandou li cavalier é al damës, cou sount dispunuës an douës filës alineaiës una douant a l’aouta, ou spetount fram al batuës dla loungi. A la fin, ant la paouza prima ch’encamineit la frizà, li cavalier–cou chercount ad bougese touti ansembiou- ou fant an leger inquin al damës. Subit dopou, aou tens ad muzica dla frizà, damës é cavalier ou avansount d’in pas è ou uneisount la znota, pre ou vant andré, ou avansount touorna é ou uneisount si bot la dreta, pre touorna la znota é pre ancoura la dreta. A la fin ad sit mouvimant, damës é cavalier, samper alineà, ou s’ trovount un douant a l’aoutou, é ou s’ tienhount coun la dreta. Al notës dla muzica i ezegouët lou prim “saout”: lou cavalier ou s’ pieguët slou ginoui dret é la dama, a speech, slou manchin. Couindi ou s’ levount é ou encaminount la loungi. Sitta i vint ezegouà ant la soua fouorma più antica: dama é cavalier ou s’ tienhount par i’avambras, sal dl’om a l’anfora. La coubia i vint gouidà daou cavalier cou avanset a pas quitì, cuërt, é ou avansount é ou acostount li pè (sal que an cherti bal ou s’ chamët “lou mes pas” o “lou pas dla burée a tre tens”). Durant sit mouvimant ou vint rout l’alineamant é al coubiës ou tendount a dispounse an serquiou, coun al damës aou mes. A la fin dla loungi li cavalier é al dames, un douant a l’aoutrou ou ancaminount li saut jà ezegouì, ma si bot li saout ou sount douì: al coubiës ou s’ piegount prima s’an ginoui é prè sou l’aoutou. Aou ters mouvimant li saout ou divienhount tre: la coubia, an ginouiouns un douant a l’aoutou, is tint par la znota doou cavalier, i poget a tera la man dreta dou cavalier. Aou couart saout ès fait l’istes coun l’aoutra man. Pre ès lou bot dou couddou, pre dl’aoutou. È s’aruvët parei aou setim saout, cou i eret an ourigin nhente meno que ouna stirbacoula que li douì ou fazìoun’ ant in sens é ant l’aoutrou. An tens più vizin a nous, sit pas –chertamant ampenhatìou- ou i eret istà sustituì coun an sempliche bazin sal douës masallës.

Dopou sit moumant saliant, al dansës ou s’ serount coun ‘na courenda tradisiounal andoua cou vienhount ezegouì coume ès costumët: la loungi é la frizà. La vivachità ad sit ultim tens ì countrastët an baroun coun lou zvilup trancouil é an po solenne dla dansi dli set saout, an particoular se ì vint ezeguià ant ‘na maneri più justa (coza chertamant nhint fachila).

La prima ampresioun qu’è iat samper soushità la courenda di set saout ad Barmës, is devët propi a sitta particoular maneri ad balala, mizurà é cazi ieratica, diversa da la maneri ad balà alegra é briouza di aoutri pais dla valada. ‘Na dansi an po drola, que chertamant est ansolit trouà ant la tipoulougìa souvant stereotipà di bal tradisiounal dal valadës.