Sàla d'Séress est sta na fésta dal più bèless e a ou dì d'ancoué e nou souvìnt ancoù dou boun ricòrt dal tant tchòsess que dj'en fàit e viù iquì. Par douì dì, l'djànss dal nòstess valàdess ou l'ant poussù deumeuràsse ansèmbiou, li djoùn avé li viéi, méste que s'fasìt an bot a l'féstess di paìss.

Par douì dì, dj'en èui tou lou tènss par lassà da part li nòsti sagrìn, par sounà e balà avé li nòsti amiss, par mindjìa e bèiri mè nou piàit a nous-àouti.

Par douì dì, dj'en poussù parla a nòsta mòda fin qu'n'aviàn djòi, sànssa avé pèui d'nint éssi scoutà. Ma parla e bàstet nìnt, e vìntet co savé scrìri e fàri an manèri que i àouti ou nou capèissount, bel s'ou sount nint d'la nòsta bourgà, s'ou rùvount d'an amoùnt ou d'an avàl, s'ou sount nà nt'li paìss d'li-àout ou lài-bass.

Est par san qui que dj'en d'amparà co nouss a scrìri mé qu'ou scrìount li avuti francoprouvensàl Savouiàrt, Valdoustàn, Valesàn e fina dal Poùliess. E s'a fàit l'Eouròpa unìa, tantòt dj'arèn na mounèia soùla, e mancrìt que pouissiàn nint butà ansèmbiou la grafia!

Mac an sìta manèri issi pouièn avé la sprànssi que nòsta lènga e nòsta cultura ou pouièount ancoù vìvri quant que nouss srèn piìnt