La courento es la danço pus counissuo di valade oucitane d'Italio. Na partio de courente soun bala en Val Cluzon e carcune devarien decò esse pratica à Chastelmagn e à Limoun; nousauti en Val Varacho ne counissen set ou vouech.
La bouscamento de toute i courente devarìo esse ugualo; toute i maniere de bala la courento ourdinario qu'ei poussu veire fin d'òuro s'artraien ben uno bou l'auto.
Ent'aquest papìe devisarei de la courento de Fraisse e de San Peire. Siou esquasi segur que en Vermala e ar Mel i la balaven decò parei.
Din i cumune pus basse ei panca agu la chanso de trouba carcun qu'al se avise pa soulament de l'esistenço de la courento ma qu'al sìe decò coun à balalo.
Lou mout "ourdinario" à la courento, que vau vous devisar, l'ei estacha mi, per esse pus quiar e per pa mesquialo bou d'aute raze de courento, coume pouarìo esse aquello de Coustiole.
La souleto diferenço entrà la courento de Fraisse e aquello de San Peire, i es din lou balet. Aquesto danço coume la pì part di dance
de la part al mes de la Val Varacho i es facho de doue part: la courento triho e lou balet.
Lou numbre di coubie qu'i la balen a pa d'empourtanço perqué esquasi touto la danço se fai tra doue persoune.

FOUEHIO DI FEGURE

Courento triho.

Feguro / numbre di pas / descricioun

1)LA MEIRO OU FIERO / Esquasi sempre vouech - Carqui bot (al Bessé) seze / I van meq sempre anan en virant en cerqui countro l'ouro e i tenen i man coume dedin la meiro de la countrodanço - Lou pas es 'n chamina oulvre.

2)LOU BALA / Esquasi sempre quatre-carqui bot cinq ou sies / I fan lou pas dal bal - Chal que
i omme sien dedin dal cerqui e i freme deforo - I se tenen i man coume dedin lou bala de la countrodanço.

3)LOU VIRA / Esquasi sempre quatre ou cinq pas -Esquasi pa de pus. / I viren bou l'ouro - I tenen i man denan (la manchino de l'omme) coume cante i balen (ma bou i bras pus dapé); i man darìe i tenen sal travers coume cante i van à la meiro -
Per vira ben, i leven lou pé manchin (la fremo lou levo pa tan perqué la vai pa ben).

4)LOU BALA / Lou meme d'inant / I balen coume inant, ma chal que i garçoun fassen atencioun à mai esse dedin del cerqui.

5)LOU VIRA / Lou meme d'inant / I viren coume inant.

Apré i van mai à la meiro e i repeten i fegure, uno apré l'auto, coume ei escrich e per 'n pau de vinque.

Balet de la courento
A' MODO DE FRAISSE:

1)LOU BALA. I fan 'n gro cerqui e tuchi se dounen i man - Chal que lou garçoun asse sìo mendìo à drecho - I balen se piasso per vouech pas.

2)LOU VIRA. I viren à dùi à dùi, coume dedin lou vira de la courento triho.- I garçoun pihen sempre la fiho qu'i es se sìo manchino e quouro quiten lou vira, per fa mai lou cerqui, i fan en maniero de pourtalo à sìo drecho - I viren per vouech pas.

Ent'aquesto maniero i omme, apré tuchi i balà, viren bou na fremo sempre diferento - E i sounaire countunen la musìco trinc que i garçoun assen vira bou toute i mendìe que l'a.

A' MODO DE SAN PEIRE:
Cante i balen fan dùi cerqui: un di freme deforo, e un di omme dedin - Tan i omme que i freme se dounen pa i man ma i tenen à pendoulioun - I omme, coume direcioun, se tenen n'estis al mes entrà sìo fremo (ou aquelo que i an just bala ensem) qu'i es à drecho e la fremo qu'i es à manchino, qu'i pihen péi per vira. Din lou bala i pas soun quatre, cinq, (belèu sies) ou vouech.

Din lou vira i pas soun quatre, cinq ou vouech - Per l'autovan al
es coume aquel de Fraisse.
Lou balet de quatre pas per lou bala e quatre pas per lou vira i lou sonen pitouest al Bessé; carqui bot me ven da pensa qu'al sìe pa trop viei, ma sei pa nen de segur. A' Roure, à San Peire (Piasso) e en Chambeto i sonen pus voulentìe lou balet fach de vouech pas per lou bala e de vouech pas per lou vira.
Aquesto tratacioun, coume se vec, i es en pau maigro: se un vol engrissalo pol leze la "countrodanço" nante l'a carqui pensament de pus.
Cha enca que die que tuchi i bot qu'ei devisa di numbre di pas, l'ai maq fach en sentent la musìco di sounaire; e quouro la capités de trouba 'n sounaire qu'al sono n'estis difrent, cha que i dançaire se adaten à la musìco souna.
Bala, bala, trinc que bala sé countent; e esse countent es enca uno di poque cause qu'i se chàten pa gaire bou de mounneo!

PREMIERO PROVO PER LOU QUADRE DI COURENTE de la part al mes de la
Val Varacho.
Courente (la quiau regardo soubre de tout i fegure).

Regulare (vol dì que lou sounaire pol souna senço bouca i dançaire - se sònen meq bou de musique nourmale)
1)COURENTO OURDINARIO
Sa danço en Vermala, ar Mel, à Fraisse e à San Peire.

2)COURENTO DE COUSTIOLE OU BALET DE COUSTIOLE
Se danço en Vermala, ar Mel, à Fraisse e à San Peire.

3)COURENTO NANTE I FAN L'ABA.
Regardo soubre de tout i aba di rigoulade e pa i aba de l'abahio - quarqui bot l'avìo aquello di aba nòu e aquello di aba viei - I la balaven à Fraisse (de segur al Vitoun) e à San Peire.

4)COURENTO DE LA RAMASSO E COURENTO DE LA CAREHO.
Counouissou just i nom que me soun sta dich da Barbo Tòni Baudrier - Belèu i soun pa trop vieie e se balaven à San Peire.

Pa regulare (vol dì que lou sounaire cha que bòuque i dançaire per adata sìo musìco à çò que i fan - polen esse souna bou la musìco nourmalo, ou, pus souvent, bou la musìco de la troumpeso, ou, qu'es lou miei, bou 'n toc de musìco de la troumpeso e 'n toc de musìco nourmalo).
1)COURENTO DE L'ESPECH.
Se dançavo al Vitoun de Fraisse e à San Peire.

2)TROUMPESO.
Carcun pouarìo pensa qu'es na danço per sìou count. Mi, me semeho de veirelo na Courento. Se balo à San Peire.

3)COURENTO DEL TAPIS.
Al journ de 'ncùi se balo soubre de tout al Bessé.

La COURENTO DI ABA DE L'ABAHIO es facho coume n'auto courento, ma l'a meq i aba de l'abahio qu'i polen balalo.
La COURENTO DI PAIASSOU i la balaven a Carleva.
La COURENTO DE L'ESTECCO se balo coume n'auto courento, ma la musìco i es difrento e ben belo.
Aquihi que san carcoso de pus, i me lou fassen da sabé e mi chambiarei lou quadre voulentìe e voulentìe! Di courente de la Castelato devisarei n'aute bot.

EDIZIONI COUMBOSCURO - lou 15 de nouvembre 1971.