Së tu mande a 'n Pöimianin so quë l'ee lou "surrealismo", la po èse qu'a reipounde pâ, e 'nvecche a Pöimian l'ee una coza dë meizoun.
Coum vouz ai dit, l'ee dë gënt da auvi 'na nöit d'uvern 'nt al teit ben chaut dë vaccha e dë lapin e 'na douzena dë lour.
-'Na vee- coumënsa un -'Ngrögna ilh era pi dapè quë öira...
Eison fai 'n poc dreisâ laz aurelha a l'aviroun, dato quë Angrögna iln'a zhamè moirà da dount ilh ee.
-Diou- countìnoua l'om ob una chara da Primma Coumunioun -quë 'na vee l'era pi dapè, cant la lhi era pâ la Coumba 'n mes...
La gënt coumënsa a böicà-lou, ma el â tira fora sa fumma, tout tranquile:
-Vöi dire... quë per anâ a la Vachira l'era cazi a plan...
'Nto saupee quë tra lou pöi dë Pöimian e la Sea dë la Vachira, qui douna su Angrögna da l'aoutre versant, la lhi a una coumba proufounda sëntena dë mettre, e al founs pasa lou Ruzilhart 'n soun leit dë peira poulidda; aloura a quërcun ven da mandâ-li se l'era soun gran-papà qu'avìa sapà la Coumba:
-No- fai èl ob un moure da Counfermasioun, -l'ee ità lou Boulè.
El aviva sa fumma, vira un poc soun chapel e pöi a 'rpilha:
-Un om,'na vee, e moun areire areire gran-papà l'avìa 'ncara couneisù, avìa trouvà un boulè, amount amount per Friera (vou savé lou pöi dë Friera, arënt al Gran Truc), cazi 'n pouinta. Ma al era groo, ma groo, crié pura qu'al era groo: lou prinsi d'î boulè. Moc qu'â pouvìa pâ chavâ-lou, tant al era groo. Aloura â sënd a meizoun e rampia mai amount òu soun appia nova e un groo souatre. A lou groupa ben a 'na roccha, eitant qu'al avìa pòu li toumbese acol, e douna man a talhà-lou al cùou; ma la chamba ilh era grosa coum le sëppa d'un chatagnìe , e lou chapèl zmilhave
lou cuvert d'una mianda. Pura, aprè un' oura qu'â picava coum un danà, e soun appia nova i talhava franc ben, lou boulè coumënsa a doundougnâ de dë sai e de dë lai, groupà coum al era, e l'om s'ee vitte tòut da sout. Ma lou souatre a pâ rezistù; â s'ee eibërnà ob una fouetà, e lou boulè â ruìna p'lou sol, libbre; pöi douna man a virâ e virâ e picatâ aval p'lou coumbalot, e groo, enorme coum al era, â derasinava lî bouisoun e li drau sèmpe pi vitte, fin quë pi aval â s'ee 'ntrupà dint al malözze, quel qu'al avìa la nià dë la poundrà; e malözze e poundrâ e boulè e rocca e tèra e peirasa e tutti li diau 'nsèm sount eifoundrà a la valâ, eiterpant tout coum la chalancha e arounchant una pröis inta coum un prechipisi qui fëzìa pòu a vee-la, e feizant un fracas teribble quë lâ vaccha lâ velavën drant dal tëmp.
Pöi tutta laz aiga, òu lou tëmp, së soun embialà 'n quee prechipisi, e l'ee lou Ruzilhart e (coum î nen din) la coumba dë Pöimian.
 së böica a l'aviroun: - Së lou souatre avese tengù...
-E toun boulè?- manda quërcun.
-Oh- fai él- â s'èra pöi pâ tant deifait, moc qu'al era sout caranta mettre dë clapiè. Aloura iz anavën pöi a pilhà-ne cant î n'avin dë bëzougn, coum a 'na minièra.
-Sai d'un- â counclû - qu'al a 'ncara lâ sëmens dë quee boulè, ma â së fia pâ a 'nsëmënâ-la. Per öira.