Ei counouisù un barbou dë Dzousaut qu'i nen fazìon barbou Mil dë v'la porte. Al ere court e menù, abilhà boù dë brôia dë rôze, dë tsamiza dë tìël dâ paî e dë môlha dë lône fielô din mizoun. Su la tete, â pourtôve une calotte d'lône que, cant la fazia freit, il servìa d'cò dë pasemountagne.
Al avìa toudzourn une pipette dint un cantoun d'la goule. D'uvern, pr'alummô sa pipette e fô icounoumia d'alumetta, â tenia alummà un pëchò lumot a soun teit. La pipette ero souvent tuô e aloure lë lumot ere proppi coumodde!
Barbou Mil al ere dla familhe dâ Grioo, la lamilhe que aboù iquelle dâ Bers -lou groo Bers e lou pzì Bers - itôve a Dzousaut doû lountemp. Dë clâ doua familha eron lâ plu bouna tèra e lou plu bau prô dë Dzousaut; tsacune d'ella, avia une baraqque dount, d'ità, i leisôvon sou
troupau dë feia: lou Grioo avion la baraqque dâ Salùddi e lou Bers iquelle de lâ Teriôsa. Din lou temps vèi, entre lâ doua familha la couria pa dë boun sônc e souvent l'ere dë ruza e magore dë patella, surtout se caque feie ou caque vatse dibouinôve!...
Ma tournen a notre barbou. C'mà tuts â travalhôve sa campagne e al acudiscìa sâ bes-cha - doua vatsa, un cavalot e caca feia - boù l'agiuëc dë sa fenne, dônde Rouzin que venia dâ Tsezôl e qu'ere une belle brôntse plu grônte qu'éel.
Al avia dou fî, Anrì e Ferdinòn, que, aprê la gron guère, soun anô travalhô en Frônse, c'mà on fait un baroun dë pradzalencs. Tu lou-z-ôn, d'en prumìa, pèi tsâ dou ou trée, d'ità sou fî venion pesô caqui dzours â paî. Aloure lë barbou ere countent.
Lou temps soun pasô, lou fî së soun mariô, pèi l'ée iclatà la guère dâ quarônt e tout ée tsandzà. Barbou Mil e sa dônde Rouzin së soun fai vèi e fatigô: i countinuôvon tu du soun pëchò minadze, en s'acountentent dë pa gaire.
Une belle ità, barbou Mil, qu'avia dzò pasà louz uchônt ôn, à agù lë gron plazér d'arvée sa rèire filhe Jusfine e soun omme, qu'eron vengo dë Lhoun: a vou leisou supouzô lâ feta qu'il on fait V'la porte lë dzourn que lou fransê soun aribbô!
Ma lou travau dë campagne persôvon e dë temp per fô fete la gn'avia pa gaire. Lë dzourn d'aprê, a l'albe, barbou Mil së leve, pren soun dôlh e së nen vai sciô. Lë neboù ouguére d'co voulgù anô éel ma l'ere fretse dë la mountagne lh'avia fait prenne soon talmente ben que â s'ere engiurmì c'mà un toppou e â s'ere pa arvihla per temp.
Finalmenta dônde Rouzin lë soune e i lhë dì d'anô pourtô didzèn â barbou. Lë neboù pren la tôque, lë tupin, soun couhìa e soun dôlh, âl enfìële la tsariëre a la poua dë Dzousaut e dint un clign d'eulh al aribbe â prà dount barbou Mil sciôve c'mà un dzouve dë vint ôn. A n'avia dzò scià un bê toc e louz indôn, satî, curbìon toù lë prà. D'cò lou bials eron ben nechô, la semblôve qu'en louz ouguèsse arpasô aboù un razour! La vente dire que barbou Mil ere un dë clou vèi barbou que dâ dôlh i fazìon soq i voulìon e sens dzî d'inforse: il imoulôvon ben ma i martlôvon encô mélh, lë segret ere tout itsì.
Astà su un indòn, barbou Mil mindze sa souppe, lë pon e la sousisse, un boucoun dë tòumme e béu un vèire dë vin. Lë neboù pren soun dôlh e acoumense a sciô ma aprê un moument lou brô acoumenson a lhë fô môl, pèi la lhë sembre de sentî un doulour a l'itsine. Ma caméne â vò pa que le sôie d'la dite e a countinua â pousô soun dôlh beq lë barbou arcoumense d'cò éel a sciô.
Dint lë sìël, un bê soulelh brilhe e inounde la valadde dë tsaloure e dë lumìëre. Lâ néu e lou glasìa d'la Bantsètte e d'la Rougnouze semblon d'ardzent, leugn së nen vai lë Clizoun e â tsônte sa vèlhe tsansoun...
A mità matinô, lë neboù ée squentà: grosa e ipésa itisa dë sciour lhë desendon su lâ dzauta, sou brô soun â tocs, sâ gômba plìon e l'itsine lhë fai embaroun môl. Aloure â së plônte e â dì a soun sègn, que sciôve sens ifoursô:
-Pirìn, perqué a uchônt ôn travalhaou encô tônt?
-Eh, por moun garsoun - ripount lë barbou - se â pensou pa à butô dë caire cacaren, c'mà fauchìa pèi cant â sarei vélh?...
Lë neboù à pa sabù soq dire, al à arprée soun dôlh e al à arcoumensà a sciô...