Une bônde dë tsasau pradzalencs, que battia lë valoun d'la Soutsìëre, aribbô a Pra d'amount î s'ée plantô casô la croute dapè lou batsasée.
Aprê aguée mindzà e begù, un dâ tsasau, Sëlestin Bertoun, qu'venia d'aribbô dë Frônse, â tire fore dë sa satsìëre une pippe e â s'apreste a la bourô. L'ere une belle pippe d'icùmme, nauve flamônte, qu'al avia atsetà dint une famö' burò a tabôc fransê dron que tournô â paî.
Felix Blönc, lë poustilhoun, vît quelle belle pippe, â dì a soun amic e couscrit: «Sëlestin, tu ô proppi une famöze pippe ... i faria une belle sibble... Vòttu qu'ou provon?..».
«Da tù ei paren a crennhre» ripount Sëlestin Bertoun que counouisia ben lâ qualitô dâ poustilhoun, un dë qu'lou tsasau qu'avihon la poudre plètse, c'mà toù lë mound sabia. E pei â countinua: «At juouc so que tu voli e... tsì perd pôie a béure a tuts!... ».
Dit e fait. Sëlestin Bertoun, que duvia esre ben segur d'éel, â fout sa pippe en l'ere.
La part un colbe e la pippe vai en mil boucoûn e boucounée!
Sëlestin Bertoun argarde itounà e ibegù souz amics be que Felix Blônc, lë tsasau bou la poudre plètse, perdia lë ventre a rire!