Cattre piloun e cattre murét,
cubèrt ëd laouze lou sôl d' cadrét.
'Na mura ar mès la partajava,
d' lai lou corp d' garda, d' sai l'èra l'ala.

L'èra lou pèilou d'noste vilagge
ëndount li jouve pouìn fâ 'd tapagge
e 'ndount li paire jo pù sansà
souënt s'artrouba-vë p'r èse 'nfourmà.

S', un viègge tan, qu'le patouflalhe
parlësë pa d' nouvèlle talhe.
Peui marounavë a dënt sarà
countra d'ar gouèrn e quì l'à fà.

Jamai quë d' Rouma oubèn d' Turin
li véne d' bèn pli mountanhin.
Marchà cubèrt cant la piuvìa
sërvìa 'dcò ar mèssou për fâ la crìa.

Manhìn, moulèta, parapieuvaire,
'spacciafournèel e cadregaire
l'èra n'uzina për 'z artizan
e 'n rendez-vous për li gadan.

Aprè 'd l'ëscora li bardasoun
souënt dësmëntiavë 'd coure a mîzoun
për juâ ai cantoun ou a cavalina,
merètti ou glin qui a l'oura 'd sina.

Finì d' gilâ, la bouratalha
coumënsë a bourâ qui d'pu grossa talha
e 'nt un clin d'eulh noste saloun
fai leuia a n'aouta generasioun.

I d'vëntava 'scora pla jouvëntù
'nt un archapava lou tëmp përdù.
Soc m'niste a magiste moustave pa
d' séra, d'sout l'ala, v'nìa 'splicà.

La tèste pu chaoude, li mès capourioun
përnin la parolla e t'nin lou masoun.
Ëstorie d' sërvagge, d' fantine, d' soursî,
d' bërlandou gabà di countrabandî...

...di tëmp ëd nonna, cant loup e chaloun
anavë 'n pastura d'aran dla mîzoun.
Peui, s'ar pu bèl, oub n' ëstoria a mîtà,
s' chambia chapittre e... finîs lou pasà.

Aloura lou "sesso" èra pa 'na manìa
d'ëstudiâ a' scora ou d' la-ne la crìa.
I'è d' séra d'sout l'ala qu' li pu fanfaroun
c'ma tanti magiste dounavë lësioun.

Li farfou pu jouve 'scoutave 'nchantà
'storie s' le donne lou pu souënt ënvëntà.
Lh'avìa pa d' mistéri qu' rëstë-së cachà
paneun sëcrèt qu' fouse pa dës'là.

Tout èra fasille për nosti savënt,
tout èra 'squiarzì aprè d'un moumënt.
Finì la souaréa, 'na vëlha chansoun
s' përdìa 'nt la neuch e un s' n'anava a mîzoun.