occitan

Cap. IV – 3ª part

Òh, aüra tuchi me rion en morre e m’asseguron que nhanca en sumi es possible veire de particulars coma aquilhi que descrivo aüra, que dins mon sumi ai vist o sentut ren que una sensacion generaa da mon còr ental deliri, dal temp que lhi particulars lhi ai inventats après, da revelhat. E quora lor ai revelat que, benlèu, efectivament es istat parelh, mon Diu que rire m’an fach en morre e que alegria ai suscitat en ilhs! Òh, de segur, ero istat subjugat ren que da la sensacion d’aquel sumi e ren que ela era restaa intacta dins mon còr ferit a sang: mas, en compens, las images auténticas e las formas de mon sumi, o ben aquelas que mi efectivament ai vist dins mon sumi, eron tan plenas d’armonia, eron talament enchantadoras e meravilhosas e talament veras que, après que me siu desvelhat, naturalament ero pas capable de las encharnar dins nòstras deblas paraulas, parelh que devion coma esblavir dins ma ment, e, donca, efectivament, benlèu, ero istat constrech inconscientement a m’inventar puei lhi particulars, naturalament en las deformant, sustot vist mon desir tant apassionat de las comunicar al pus lèst, bèla coma venia. Mas, d’autre cant, coma auriu polgut pas creire que tot aquò existia, e existia, bènleu, d’una maniera mila bòts melhora, pus luminosa e jaiosa de çò que contiavo? Que sie istat un sumi, mas tot aquò polia pas ren exíster. Saubetz, vos direi un secret: tot aquò, benlèu, es pas istat gis un sumi! Puei que aicí s’es passat qualquaren, qualquaren de tan terriblament ver, que seria istat impossible avertir en sumi. Admetem que mon sumi l’aie generat mon còr, mas es que mon còr da solet seria istat capable de generar aquela terribla veritat que puei m’es arribaa? Coma auriu polgut me l’inventar da solet, o la sumiar abo mon còr? Possible que mon còr mesquin e mon intellèct capriciós e insignificant aien polgut s’elevar fins a una tala revelacion de la veritat? Òh, jutjatz vos: fins aüra l’ai tengut estremat, mas aüra diserei fins al fons decò aquesta veritat. Lo fach es que mi... lhi ai destraviats tuchi!