Lou rigoudin es na danso pa gaire counisuo. Sounaire boun a sounalou, ne counouisou mec quatre: Miquellou de Champ Soubiran de Fraisse, Jacques de la vilo de Fraisse, Jan Bernardi de San Peire e Jusep da Rous de San Peire. Per ishò, dizariou qu'al pol esse counsiderà coume na danso de San Peire e de Fraisse. Al pouìo decò esse counisù al Mel perqué i jouve de Fraisse e aquihi dar Mel i se praticaven 'n paou: ma aquesto es mec n'ideio, qué mi ei pa degune prove.
De persoune encà bone a bala-lou n'à pa decò gaire a apré, uno dì ente na maniero e l'aouto ente n'aouto. La vai encà ben qu'es na danso pa coumplicà de fasoun que i diferense nou derangen pa trop.
Jo sesant'an passà pouìo esse stimà la danso di viei: i es pa loungo, i es pa coumplicà, i es pa fatiganto; bou 'cò piazìo de pus ai viei que ai jouve.
Se ballo mec entrà doue persoune: 'n garsoun e na mendìo, ma per grinhà pouìen decò bala-lou doue freme ou dui omme. L' es fach de doue fegure que soun lou balà e lou virà.
Acò que lou diferenseo di aouti dui bal qu'i se balen decò entrà doue persoune (la Camaigro e lou Calissoun) l'es que couro i balen, i doue persoune se doùnen pa i man e i balen coumpletament destachà e per siou count.
I mout de la chansoun soun en Piamountes:

Rigoudin balelou balelou
Rigoudin balelou da bin
Dame la man biondina bella
Dame la man biondina 'la.

Apré lou rigoudin i fan pa lou balet, soubre de tout a Fraisse. E se carqui sounaire de San Peire i lou sounessen, butariou escazi la man sal fouec que se trato de na counfuzioun bou la pì part di aoute danse de la part al mes de la Val Varacho, que i vòlen toute lou balet.
Dedin la descrisioun di fegure recordou i diferense de la maniero de bala-lou entrà 'n sounaire e l'aoute.

FOUEHIO DI FEGURE.
1)LOU BALÀ vouech pas:
-Jan Bernardi: I doue persoune bàlen per siou count, senso douna-se i man; i vìren se piasso, countro l'ouro, en fazent lou pas dal bal. I fan a poc pres dui vir. -Jusep da Rous: L'estes coume Jan Bernardi.
Carqui bot i fan decò d'esquers, i fan i tascoun!
-Miquellou: I doue persoune bàlen per siou count, senso douna-se i man; i fan tuchi i gestas, uno vai su, l'aouto ven ju, de saout dal diene! Mi creou que i péisen decò vira-se l'eschino coume i fan a San Peire.
2) LOU VIRÀ vouech pas:
-Jan Bernardi: I se doùnen lou bras drech e i vìren bou l'ouro en fazent 'n pichot paset (dui pas bou la chambo drecho e un bou la manchino).
-Jusep da Rous:En tenen-tese bou la man drecho i vìren bou l'ouro per quatre pas, apré 'n tenentese bou le man manchino i vìren countro l'ouro per quatre pas. Lou pas es l'estes d'aquel de Jan.
-Miquellou: I se doùnen la man drecho; carqui bot i la lèven decò su. I vìren bou l'ouro. Creou que i fàssen lou pas que Jan m'a dich.

Apré i lou repèten arqui bot, tan que i an vouehio de balà.

Fraisse, lou 20 de San Jacou 1972.