Enviroun dâ dërset dë blìe fin a la meità dë mars noû dë la Val San Martin nouz an agù pâ mâl dë fastuddi për la néou; a Prâl, Masêl, Rooudourét, Salso, Ruclarét e Faié la gënt é ità blouca. Lâ via corousabbla an agù lour chalancha e lour eicaias qu'an fërmà lou pasagge d'lâ machina.
Qui ero amount é ità amount, qui ero aval é ità aval. Lou telefonne marchavo pâ e ënt lâ bourjâ dë Prâl a un serten pounth la gënt an agù pòou d'èse ënterà da la néou e da lâ chalancha. L'à coumënsà l'aprê mes-jouërn dâ dërsèt dë blìe. Lî valdê qu'avìën fait fêto (l'é lou jouërn qu'arcordo la libërtà dounâ dâ Rèi Charl Albert ënt â 1848) ën sourtënt dâ dînâ së soun troubà drant a ün grô pias dë néou. La noeit l'à countinuà e dëcò lou jouërn aprê; a la fin cant l'à quità ün poc, nouz èrën ënterà ënt la néou: un mèttre â Prìe, dui mèttre a Prâl e trèi au cattre su lâ mountanha.
Poei lh'é vëngù d'autro néou e lou nivèl dla nëvaddo é mountà bën aut. A Prâl lî dui mèttre soun vengù trèi e més, poei cattre: lî plantoun d'la sejouvìo «Tërze Lac» soun ità cubèrt; lî cubèrt d'lâ meizoun an coumënsà a quërzinâ. A laz Ourgìëra dë Prâl uno noeit dâ mê dë mars la s'é riscà d'deigrasia.
La gënt dë lâ bourgjâ ën vëiënt quë la quitavo pâ dë vënî së soun counsëntrà ënt la meizoun pi aval dâ vielagge. Ilh an pasà la noeit ën lezënt la Bubbio ëntant que ilh eicoutavën l'armour d'lâ chalancha. Barbo Oreste Lëgìe al èro pâ ooub lour.
Pi courajoû dë lh'autri ou pi tëmërari a s'èro coûja ën soun lèit e â rounflavo coum un souc cant la chalancho é aribâ su sa meinzoun.
La gënt sout que lëzìo la Bubbio ilh àn aouvì lou tapagge dë la chalancho qu'aribavo a ilh an laisà lou libbre për la palo; Barbo Lëgìe al é ità tirà foro da sa bastiddo eitripâ. A s'èro pâ avizà dë rién, lou paoure.
Cant al é sourtì, la lh'é vëngù mâl; soun chabot èro cubèrt dë néou, lâ charièra érën pléna dë quëllo dë la chalancho, uno granjo darèire d'la souo èro deipareisùo sout a la neoul. Lî dann soun ità pëzant dapërtout. A Prâl, Prìe, Ruclarét, Masêl e Rooudourét lî chantìe di cubèrt dë tantâ meizoun soun choeit e la gënt, së lou gouvern lî ajùo pa ooub dë soldi, î pënsën d'ëscapâsé l'aoutoenh quë vén. En quëtto calamità d' lâ chalancha lou gouvèrn à fait calcozo ma soc qu'l'à fait soûto lh'é aribà un elicoptère dî carabinìe qu'à pourtà de sachâ dë pan a Prâl, Masêl, Rooudourét e Salso. La gënt dë Prâl voulìën dë nafto për lâ pala mecanicca que toulìën la néou.
A la plaso dë nafto coum ai jò dît ilt an agù dë pan e la Prouvinsio à dëgù anâ pilhâ la nafto a la miniéro de la Janno en fëzënt pasâ lî voulountari su lâ chalancha, â dangie. Poei la lei è vengù lh'Alpin. A Prâl ilh avìën bëzounh dë lh'Alpin për palâ la néou dë si dî cubèrt quë quërzinàvën e për tanta aoutrâ coza. Ma lh'alpin s'en soun ità ën cazermo à Prìe, a minjâ a l'osto e a durmî ënt â sac a pèal përqué lour capitani a pâ voulgù lî fâ pasâ a travèrs dë lâ chalancha për poou quë la lour nën chëguése uno s'la têto. Dui alpin ooub lour radio soun anà a Prâl ma për lî mënâ amount la lei è dëgù aribâ un elicoptère d' l'armaddo qu'à fait cattre viagge. Qui s'é pâ eitalbià l'é lou Mnistre Valdê dî Guiggou e lou prèire d' la Vìëlo. Lî dui om dë glèizo i n'an faita dë couërsa a travèrs dë la néou! Lou Mnistre qu' é un poc enfermìe al é anà vizitâ lî malavi ën lâ bourjâ; lou Prèire al à courù coum un màt a travèrs là chalancha per anâ pilhâ lâ mëzina fin a la Janno. Tuti a Prâl lour soun ërcourouisënt e lî amarsìën.