Aqueste viatge Asalais vòl pròpi veire La Baïa de Sant Peire dal moment que per una autra la chaleria aténder cinc ans. Qué de gent! Qué de personatges! Qué de costums! Qué de bindèls, qué de colors! Lhi premiers qu'arribon son Lhi Tamborins qu'anóncion la fèsta mas just après, maestós sus lhi cavals, abo lors costums vèrds e lo chapèl da guerrier roman, se veon Lhi Cavaliers. Asalais tròba simpàtic, bèla se lhi fai na brisa paor, L'Arlequin abo de gruelhas de limaças a l'entorn dal chapèl, que lhi sopata sus lo morre lo penàs d'un jarri. Lo Vielh e La Vielha te fan crepar dal rire. La Vielha, abo sa gonèla rossa e preciosa e na cúfia blancha trabalhaa a poientas, ilh pòrta un nenet dins la cuna. Fiers e seriós avançon Lhi Alums: lo chapèl a mesa luna abo dessús A, M, P, T, S, second lo nivèl de comand, lo sabre lusent, la merluça adobaa d’eschirpa e cocardas. De lunvreas e bindèls pendon a desenas de mètres dal chapèl de Lhi Usoarts. Lhi mai alègres son Lhi Espós; an vuelha de balar e uchar. A! o sabetz? Son tuchi òmes, decò La Vielha, Las Esposas e La Senhora. Mas las veras protagonistas de La Baïa son las fremas que aprèston aquilhi rics costums. Es la tradicion!!!