|
As.: "Virar lo mond la me plai, mas la montanha es totjorn la montanha; siu aürosa que siem passats dal Cairàs".
Al.: "Anemc-o a Sant Veran a cerchar n'aubèrge?"
As.: "Bò, parelh nos fasem decò donar d'enformacions per conóisser la zòna".
Al.: "Gacha, sus aqueste libret lhi a tot çò que polem far: espassejadas, esquí d'èrba, lieieta d'istat, rampinhadas, e polem fins calar lo riu abo las embarcacions de goma, aquò que sònon rafting".
As.: "La lieieta d'estiu? Qu'ei-la aquò?”
Al.: "O demando a tu! Qué ne'n sai mi? L'ai vist escrich aquí sus. Deman anem veire".
Lhi nòstri dui son pròpi jaiós decò perqué ilh an trobat un jòli aubèrge ente lhi a un baron de joves.
Jan Marc: "Adiu, iu siu Jan Marc e ilhe es Magalí. Siem de Gap e vosautri, d'ente venetz-o?"
As. : "Chao, nosautri siem Asalais e Alèxi e venem des Valadas Occitanas en Itàlia, just aquí darreire. Malaürosament avem esquasi finit nòstras vacanças e avem pensat de far encara dos-quatre jorns fòra via".
Jan Marc: "Sietz já anatz sus la lieieta d'istat?"
Al.: "Non, volíem just sauber çò qu'ere-la".
Magalí: "Ilh es ben amusanta! Qualquaren coma na pichòta lieia que davala la montanha dins na canalina de tòla, ençai e enlai a fòrta velocitat. Se voletz, deman, lhi polem anar ensem!"
Es parelh qu'Asalais e Alèxi, abo lhi novèls amís, bersacs sus las espatlas, ilh parton per de nòvas experienças emocionantas.
|
