Les nèbies coùroun acoumatin, les pasoun resquiont les poùnches pu àoutes de Maneho, la Marquiso, lou Pelvou...

Drèire a n'èles s'làisoun en sel poulit, sperlinà. Chal vèire que spetacle de coulour: e s'ruà, de màches grìses que spounchun aqui e eilai ai mes dei vert ou ei mes di piai e di fràise.

Aqueles nèbies que couroun e aquel soulei quiar on pourtà din tuchi na pouncho de countentesso,  i chaminoun tuchi 'mbe lou nas a n'aire. Apres n'uvern dur e lonc, l'aviò agù ne primo dal diaou e tuchi journ la piouviò.

Aquie que s'escouòntroun per s'ruà, s'masières que von de courso per pouiser girar bounouro, i pastouret e... blou d'cò i chon, tuchi coumo salut i-on "Les nèbies von d'vers Màiro"...

E lei inutil qu-anà lour parlar de "Legge sull'aborto, riforma universitaria, terrorismo politico od ordine pubblico, politica economica e crollo delle istituzioni..."

Tout aquò s'trop luenh de lour, tout aquò fai part den mound, de na civiltà que-i. póloun pa crèire d'quò lour.

"Les nèbies von d'vers Màiro...!" e la naturo que fai festo, lou fen que creis, lou bouosq da far a sus di Bac, s'trùfes da r'coousar l'uerge da semenar, lou choouliero da serbear...

"Les nèbies von d'vers Màiro e... i scoulier que dementioun finde d'anar a l'esame ou que scàpoun d'courso just fenì l'e-scolo pr-anar n'pasturo.

Les ruà que anun-bot s'empioun de vàches, de vel de feès, d'picoun de rodoun e d'ansiles, de chon que jàpoun de meinà que coùroun 'mbe lour zainet s'l'eisino e de bastoun pu lonc que lour.

Aquelo lei la vito que i n'tereso perquè aquelo lei la coso que i sèntoun. Degun a l'escolo lour à moustrà carcaren de lour mound..

L'escolo lour moustro l'estorio di pople, e di rei e des guèrres per far ou defènder la pàtrio. Ma qualo patrio?

Lour estòrio i l'on n'preso dai viei, n'estòrio de fam e d'misèries, de travai. E 'rnbe lour lengo, dai viei i-on n'pres a respetar la naturo, e i vouiser ben coumo a na màire, a se defénder quonte i fai i caprisi. E pei, ei mes des stòries de masq e foulatoùnes de senhal e de mouort que parloun i-on n'pres que les nèbies, lou soulei la puèio e lou pon, soun en quarque maniero lià n'semou.

Ai oouvì en "direttore didattico" acusar nouostro gent, ei pounchavo lou dè couontro aquie genitour que fon travaiar la meinà, n'dizont que d'istà i demèntioun sòque i-on n'pres a l'escolo, que lour estrucioun pol pà anar avonti coumo aquíe que istoun din les viles.

Tout aquò da soun pounch de visto: e dir que dequò èl es ousiton, dequò èl es neisù n'mountanho e bloou dequò èl à couneisù aquelo vito.

Soun pasà i temp n'te i genitour gavàvoun la meinà da s'escòles per i far travaiar. Lei ver que d'istà i von n'pasturo ou i fon quarque àoutre travaiot ma lei pa aquò crèiou que i fai star arèire di i-estudi. A crèiiu n'sinto que les rasoun que quàrque bot pòloun pourtar a n'aquò soun ben d'àoutres.

Veèn d'escoles que per d'an n'tier von avanti a "supplenti", de magistre que ariboun amoun senso counouiser aren de nouostro gent, de ses tradicioun e de ses uzònses. N'escouontre tra dui mound tropo difrent e lou pres d'aquò s'pagà da nouòstro meinà.

Souvent quonte i coumensoun l'escolo i son pa na parolo d'italion i-on sempre parlà lour lengo.

I "asili" esistoun pa sus nouòstres mountanhes, e, bele se quarque bot a n'aquel age i soun jo gardar na gasàiro de vaches, souvent i-on pa jomes oouvi a parlar d'alfabet.

 

Mac n'escolo que tene counte de l'ambient e de magistre que counoùisoun nouostro lengo e nouostro civiltà poularen moudifiar equeles situosioun.

 

La coulpo de tout aquò es pa  di genitour ni 'dla meinà, ma den sisteme qu'à sempre tendù a coulounizar e sfruchar nouòstres mountanhes senso ren far per soun prougres.

 

Ma la mouralo, vièio coumo lou mound e 'nca sempre valìdo, es que "la pratico val mai que la gramatico".

 

                                                                                                                                      Tounin Besoun