La i-a ben ducatre cümünes de i Valades Usitanes que a la fin dal mes de mai se retroben a chambiar i lur cunsei cümünal. La n'i-a pa en pau, me tütün, en te ne man d'aqueste, es pusibu na presenso d'autunumisto usitan.

Es na presenso que pensen deve pa mancar, visi lu trabai que lu Muviment Autunumisto Usitan es en tren de menar dedin i Valades en t'aquesti temp.

I premìe an de la sio vito lu MAO avio subretut punchà a far sorte de liste ben marcà bu lu siu simbul, en forto upuzisiun a tüchi i partì italian e a i persune d'aquii parti dedin i Valades. Aquelo es istà na vio pulitico ben düro da tiene, me ben empurtanto per marcar dran a tüchi i noste idee, la nosto presenso, i nostri prugrarno. Es decò ista na pulitico düro da tiene per manco de cadre dirijent dedin lu Muviment e per manco d'esperienso aministrativo tra i-usitanisto.

Tütün es subretut per aquel chamin que na bono man d'autunumisto se sun fach i-os, que an emparà a mestrejar i prublemo de la jent.

Encüi, paso de vint an apres la surtio de i prime liste autunumiste, bu l'esperienso que ben carcün de nusauti s'es fach trabaiant dedin lu siu pais, me subretut bu l'enteresi que per aqui en vir meuro süs i noste idees, pensen que la sie vengü lu mument de serchar l'üniun, pituest que levar, sulet e fier, la crus e l'estelo. Pa per acò i-usitanisto devun renunsiar a bramar l'Usitanio da tuchi i caire; me chal ben veire que lu trabai que eiro aven dran es aquel d'ese la puncho d'en muviment ben mai grant, que traverse i sentevint paìs usitan de i Valades.

Mancun pa i senhal que aquel muviment la sie en tren de se bastir; de mai en mai sendic e conseìer se retrobun, menun ensemo de bataie empurtante per la vito de i Valades; de mai en mai sort foro que "autunumìo" e "identitat usitano" enteresun e sun pià sal seriu. Tut acò la nais pa basto que sie: la i-a darie lu pichot me empurtant trabai dal MAO; en trabai que encumenso a ese recuneisü e lu Muviment ne sort renfursà e cunsiderà, beleu enca mai de i vut que pio.

Per arviscular aquesti arpuel d'autunumio e d'usitanisme, que fin eiro aven semenà, pensen que la sie empurtant que belo estubot i-autunumisto usitan se presentun a i-elesiun de i lur paìs. Beleu la sierv pa tan far de liste basto que la sie, belo se en testo la i-a la crus e l'estelo; pituest tucho trabaiar per far de bone liste, lu pi pusibu ünitarie; de liste que barunun de jent seriuzo e enteresà a gandir lu pais e la valado.

Creien que i prugramo d'aquele liste polun ren fermase mec ai pichoti u gros prublemo dal paìs, devun punchar a en descurs de reneisenso de la muntanho usitano, de üniun a travers la valado e i valades. Es ben quiar que se en te lu mai de cümüne usitane suren far naise d'aqueste liste la cunfianso en tal MAO s'esgrandiré, me subretut s'esgrandiré la pulitico d'üniun a travers la nosto muntanho. E d'üniun i nosti paìs d'aquesti temp an ben damanco.