Ai tacat a 14 ans, fasiu lo manoal per un'empresa. Après ai provat de chambiar, siu anat per na peça en fàbrica, me semelha dui ans, sai nhanca pus ben. Après ai já mai tacat per mon compt, da solet. Era lo mes d'abril, ai fach na casa aicí a Andòn e mon conhat m'a donat na man. Me plasia e parelh ai contunhat. Erem sòcis mi, mon fraire e Tonin e sèm anat anant fins a l'autre jorn que siu anat en pension. Trabalho encà e ai dui filhs que m'ajuen. Verament siu mi qu'ajuo lor, oramai mi ai fach aquò miu, mas la me plai aqueste trabalh: far murs, carpenteria, murar a peira, piastrelar, tot aquò.

Ai trabalhat a Vaudier, a Andòn, a Robilant, a Rocavion, a Roascha, a Santa Crotz de Cervasca, a O Borg.

Nosautri fasem tot, da l'escau a la fins, fasem tot, fins a l'arriçadura.

Fins qu'anem d'acòrdi anem anant tuchi ensem. Après laisso a lor, que se desbruelhen... Lo pus vielh es já ben en gamba, lo pus jove pas encà pro, mas... Na vira ben o mal t'arrajaves, aüra es pus parelh, tuchi aquilhi prejectistas, tuchi aquilhi dessenhs: lo pus vielh ent'aquestas causas es pus pratic de mi... e lo pus jove plan planet se fai. Espero que vanen d'acòrdi, mas lor van d'acòrdi, e parelh van anant coma siu anat anant mi.