Una causa que m'a donat un baron de satisfaccions es d'arranjar las màquinas per l'agricoltura. Es estat lo miu premier trabalh. Aviu 15 ans e siu anat a Sant Ròc e aquí fasiam un pauc de tot, s'enventariem un pauc de tot: da las reseas a lhi tamanhons. Era lo moment dal boom, lo moment que se creava de tot. Lhi païsans me fasien confiança e se fichaven dins mas mans; ent'aquel temp vai que n'ai venduas de dalhairas e d'estroncatritz. Embe aquela dalhaira lhi fasien far de tot, sobretot en montanha, embe 370 mila liras avien la dalhaira e lo remòrqui. Ne'n fasien pas ren dal tractor. Aviu fins enventat na màquina per far las reas e culhir lhi bòdis, aviem modifiat la barra a la dalhaira per sear lo gran e la sèel. Las dalhairas que marchaven a petròli las modifiavo e las fasiu anar a bensina. Modifiavo las dalhairas e enventavo de màquinas que existien pas...

M'agradava ben decò de far lhi marchats, anaviam d'en pertot per vénder las dalhairas, per las provar. Ai agut mai de satisfaccion da las màquinas agrícolas que da las veituras. Aüra es pita parelh mas d'en premier, per na veitura, quora coneissies qualcòsa après era sempre estés. La màquina de l'agricoltura te permetia de far de chambiaments per far-la anar mielh, sempre de causas nòvas. Bèla aquí après son arribaas de novitat coma lhi desboissonaors e d'autras causas.

L'òme de campanha e lo montanar te donen mai de plaser d'un que a na bèla veitura. A Sant Ròc, o après aicí, ai sempre fach la mesma vita: lo sande après metzjorn e la diamenja matin anaviam far lhi marchats per presentar e vénder las màquinas agrícolas.

Aicí ai dubèrt la diamenja 28 de lulh dal 1968, ental '69 me siu mariat e siu puei anat 8 jorns en França, dal sande al sande. Son estaas las mias premieras vacanças. Après... sempre anant, gavat un o dui jorns per anar a un mariatge en Toscana. Ensoma, totas las matinaas quié veno aicí e duèrbo lhi uis per donar un servici, sobretot an aquilhi balòs dal Parc, bèla lo luns que, almenc d'uvèrn, seria barrat