A l'atge de 12 ans ai començat a far l'aprendista da mèstre da bòsc anant a trabalhar da un qu'avia la menuseria aicí a Vaudier, que m'a pilhat coma bòcha. Siu restat sèt ans a passar carta vedre e a far tuchi lhi trabalhs manuals que lhi avia sensa librets ni paga, pas ren. Puei a dètz-e-sèt ans mon conhat, qu'era escultor dal bòsc, m'a fach anar ailen a Milan dins un mobilifici e ai trabalhat dins una menuseria per dui ans. Puei siu já mai retornat a Vaudier. D'amís de mon paire, d'empresaris, m'an possat a me butar per mon compt, e parelh ai fach. Lhi a mai de cincant'ans que siu inscrich a la Chambra de Comèrci, tè. Ai sempre continuat solet, me siu mariat, ai agut dui filhs que se son diplomats tuchi dui da geòmetra e an continuat mon trabalh.

De fèrias? Enlora n'avia pas. Aüra sem obligats, embe lhi filhs e lhi obriers... aüra serrarèm per tres setmanas, lhi temps an chambiat, encuei es mielh d'enlora. Se tornesse arreire fariu já mai lo mèstre da bòsc. Es pròpi una vocacion. Decò mi filhs lo fan per vocacion. Quora an agut lo diplòma polion s'emplegar, enlora lhi avia la possibilitat de l'Enel... mas a pena an finit lo militar, se son súbit butats dins l'empresa. Aquela lor decision ma donat l'estímul per ajornar lhi maquinaris, per respónder a las exigenças di clients.

La nòstra, mia e de mon fraire, es una passion qu'avem ereditaa da mon paire lhi a passa vint ans, fins da pichòts: la passion per lo bòsc. Lo bòsc transmet de passions que venta provar per comprene verament çò que se pròva a trabalhar lo bòsc. Da un tòc de bòsc, da un àrbol se pòlon organizar tantas còsas, se pòlon personalizar. Lo bèl dal bòsc es que se pòl personalizar e al mesme temp se pòlon obtenir de resultats extraordinaris coma quantitat de produccion. En aquesti ans avem aumentat un baron la produccion, arribem a contentar un baron de demanda per poler èsser coneissuts decò a livèl provincial e regional. Aquò per nosautri es important, perque vòl dir créisser. L'azienda es naissua pichòta, produsia un numre pichòt de serraments l'an; après quora son arribaas las màquinas electrònicas, sensa aumentar mai que tant la man d'òbra lhi numres an creissut; lhi numres dins aqueste mond aicí son venguts importantíssims. Chal èsser equipats coma otís e arribar a intrar embe de prècis concorrencials dins lo marchat. Sus aquò, decò gràcias a l'ajut de mon paire, arribem traquillament a istar dins aquelas faissas e aquò nos dona la possibilitat de continuar a trabalhar e far conéisser nòstra marca, qu'es liaa a nòstra valada. Nòstra menuseria es liaa a nòstra valada perque tanti assòcion lo nom de la menuseria Barale a Vaudier e aquò a nosautri fai ben de plaser. En essent aicí da cinquant'ans creo de bèl avant que la menuseria sie un ponch estable de nòstra valada.