Decò aquest viage en Coumboscuro avén trouba la chalour estrambourdanto de tuchi lis an per lou gran rescountre prouvençal de la primiero diamenjo de setembre.

   Lou ROUMIAGE DE SETEMBRE en Coumboscuro es uno escasenço que counéissen de loung tuchi li fraires de lengo di nuestes valades de Couni e de Turin coumo aqueli de l'autro man de lis Aups, li que abìten dins li grandes valados de la Durenço e dal Rose, li gent de la plano coumo aqueles de la mountanho.

   Es pr'acò que aquelo primièro diamenjo de setembre soun tuchi aqui present voulountous e enflama de sentiment grinous. Tuchi lis ans coumo acò.

Tuchi lis ans entourn d'aquelo festo de la Prouvenço alpenco - de la « gavoutìno », se voulès - que se destend sus li dui pendìs de la mountanho, envers l'Estat italian e envers l'estat francés.

   Aquest an es esta lou bel group de « L'EISSAME » de Seloun de Prouvenço, que - ensèm an-aquel mountanhard de Coumboscuro - a sustengu l'espetacle poupoulari e a mena de danço poulido e fino emé si joùino chato abiha en arlatenco (15). Dances roudanenco de Leissame, dances rudes de Coumboscuro, belles sounades di tambourinaires de Seloun e de li brave councertisto piemountés de «Princi Raimound (emé vièllo, espinelo, viòuloun), grando recampado de mounde de tout caire, un fube de espetatour eilmoun per li pra, dentourn de l'esplanado de Sancto Lucìo.

   Avén encaro dins nostre cor - e ié lou voulén dire fort - lou souveni d'aqueli vertadiè fraires prouvençau vengu de-z-Ais, de San Roumiè, de Gap, de Marsiho, de Seloun, de Manosco, de Arli, de Barjòu, d'Avignoun, per nous dire de persouno (e pas soulamen per message): « Sian aqui, sian present per vous ajuda e vous counfourta  emé nostis bras e nostro obro e nostre soustèn dirét. Sabén que li bello paraulo sufison pas. E dòu moumen que la causo prouvençalo es vivento e aitoualo e bello e demando d'esfors emai da unioun per s'escampa sus li dous caire dis Aups, sian aqui per travaia e faire d'unioun emé vautre! ».

   Gramacis, fraires prouvençau de l'autro man dis Aups; Gramacis, fraires prouvençau di nostes valades cisalpines! Gramacis, fraires e amis de la plano piemountéso, que nous sè dapè emé vostre sentiment!

   En tuchi lou Arveire coural à l'an que vèn. A un autre ROUMIAGE DE SETEMBRE!