Soun noun de familho l'ero Alliaud, ma al ero ben pi counouisù aboù lou soubriquet de "General", que sabbou pâ de dount li sie vengù, perqué la me rezulto pâ que caicun de sî velh (segne, reire-segne etc.) foussan general dint caico armaddo ou dint la Gardo Nasiounalo.
Al ee mourt en mil nausent e darset a l'agge de otiant'e set ân. L'ero lou pi brave omme su setto tero: simple, just, bien devot, travalhör, pasient e encapabble de fâ de mal a qui que sie; â counouisìo ren que la parollo "perdoun" e pâ quello de la "venjanso". Al ero decò fort e rezistent a la fatiggo coume la se n'ee papì vit eisì ei paî aprê el. Moun paire me countiavo que barbou Pin, cant al avìo mequé l'agge de caranto ou sincant'ân, al anavo, un viegge a l'ân, fâ sa prouvisto de melio a Pinirol, e soun sac aboù sinc eimina de melio â se lou portavo su l'eichino da Pinirol fin ei moulin de V'lou Boc per eipargnâ lî douzze soldi de port que li demandavan lî cartounìe per lou cherjâ su lour cartoun. Â vivìo, aboù sa fenno Catlino, de soun travalh de campagno, e cant soun uniqque filh, Zidor, ee ità d'iagge e s'ee tòut de meizoun, al avìo afilhà un pichit neboù, un garsounet de uno dezeno d'ân, qu'ero restà senso maire, sore de barbou Pin, mourto aprê ese picatâ aval per un rochìe en möient erbo.
Quel orfelin, que se noumavo Pierot Gaydou, ero un biriquin cazi endoumabble, per pâ dire un varadin; e a el la se lh'ajountiavo un autre baloset dei meme agge: Fransezot, lou filh de Jan General, couzin de barbou Pin, e qu'abitavo dint lou meme cazei de lh'Esertoun, que se trobbo su la vio que da V'lou Boc porto amount en Garnìe. Qu'li doû gamin abuzavan un pauc trop de la pasienso e de la bountà de barbou Pin e i li coumbinavan toutto sorto de marminella e de scrocarìa.
Cant Pierot a agù vint ân, â se n'ez anà a Marselho e â s'ee embauchà da soun bo-frere Jouvenal, qu'avìo un groo magazin d'outilhagge per maulin. Estent qu'â preferavo lâ gargotta a soun atelìe de travalh, toutta lâ nöit aprê sino â frecantavo un bistrò qu'apartenìo a un qu'ero de noutro valaddo e qu'avìo coume clientello tout de gent emigrà de neutre paî e decò bieen de gent dei post que coumprenìan noutre patouà. Dint quee local (que la nöit ero bourà de pi que la gleizo lou journ de Paca), Pierot coumensavo a countiâ lâ mizeria e lâ marminella que el e soun couzin Fransezot avìan coumbinà a quee paure barbu Pin, e la gent a rire fin qu'î se pisavan acol, a li battre lâ man, a li paiâ da béoure a voulountà. L'ee per queen que, vers la
coumensâ dei siecle e per uno bello partìo d'ân, barbou Pin, senso jamai aguee portà sì cau a Marselho, da noutri emigrà e da bien d'autri client dei cabaret al ero counouisù melh que li proutagouniste de la Coumedìo coumicco fransezo!
Un dì tir birboun que lî doû vouaioù avìan jouà a barbou Pin l'ee set:
D'embê que barbou Pin e sa Catlino minjavan sino, lî doû birbant soun anà lh'eitoupâ, per deforo, la fenetro de soun teit ounte î dörmìan, de maniero que elli, en se cougent ei lumme de lour luserno cant l'ero jò ben eicur deforo, î se soun pâ avizà de ren. Aprê aguee dörmì uno dezeno d'oura, la vaccho a coumensà a trampignâ e cornâ; ma barbou Pin, qu'avìo pâ gî de moutra dint lou teit, en agachent vers la fenetro e veient que l'ero encâ eicur coumà lou limbe, a pensà que l'albo ero encâ lögn e â s'ee vira de l'autre caire per fâ encâ un bê son. Aprê d'autra tree ou cattr'oura de dörmiaddo, lou cornâ e lou vacarme de la vaccho e lou bezelâ de la chabbro se fazìan talament ensistent e ensuportabble que barbou Pin sauto bâ dei leit e vai öbrì la porto dei teit: â resto eibelucà da un soulelh eiclatant e briljant que eiclaro lou versant de l'adreit de la valaddo e coumenso jò a coujâ su lou versant de l'envers ounte se trobbo lh'Esertoun. Aloura â bralho: "Countana! Catlino, que miracle! See matin lou soulelh levo a l'envers!"

(la countinùo)