En 1954 Frederi Mistral foundavo lou « Felibrige », lou mouvement que despi centvintequatre ans es encaro sus la batesto, per avivàr la culturo e la lengo de Prouvenço.

   Dal Felibrige se pol pensar e dir de tout, en boun ou en marri sentour: al moument d'eiro es ren li tecnìques de countestacioun que manquen; ma encha recounéisse que, se encuéi se parlo encaro de lengo e de civilisasioun prouvençalo, se i'a encaro un mounde d'Oc e se desputo sus li siei problemo, acò es perqué lou Felibrige a fisa un viage per tuchi uno novo couscienço etnico.

   Ourganisativament aquest mouvement a atrouba soun estruituracioun dins li mantenenços: pau-près uno per rejoun dal « miejour ».

   Es justament la Montenenço de Prouvenço que s'es recampa sande e diamenjo 23 e 24 de setembre, à Barcilounéto sus Ubaio. A l'ounour de l'acamp eren li relaciouns sus l'obro literario e istourico de Simoun Jude Honnorat, de François Arnaud e de Germaine Waton de Ferry, li tres figures mai empourtantes dins l'estorio prouvençalo de « La Valéia ».

   Di tres, lou persounage lou mai enteressant es, segur, Germano Waton de Ferry, autouro dal pouèmo gavot « BENOITA », counsacra à li apariciouns de la Vierge à la pastreto dal Laus Benoita Rancurel (siecle XVII);

   « Benoita es lou cap d'obro de la gavoutino prouvençalo, la sublimacioun pouetìco de tout lou pais ubaiènc e gapènc, que ié revièu emé li siéi grands ourisount mountanhòl, li lavines di siéi pendìs (li « coulaiàs », li sònen ilài), lou travai di siéi paisàns e pastres.

   Dins lou quadre de l'acamp de Mantenenço à Barcilounéto figuravo tambèn l'enteressanto espousicioun de libres, revistes e journals sus la Valéio de l'Ubaio: obres de Honnorat, Arnaud, Germano W. de Ferry, diciounaris, letres, fotò, gravures, atlanti lenguisti de Prouvenço etc. Uno causo da vèire e que vai à ounour de li ourganisaires, entra elis soubretout li amis Jan Ebrard de Manosco, soutosèndi, Pau Pons majourau responsable de la gavoutino, e Jan Meyran, de « La Valéia ».

   E uno causo da gaudìr es esta tambèn l'espetacle (court d'amour) de diamenjo après mesjourn, emé groups e coustumes de tout caire de Prouvenço e Coumboscuro tambèn.

   Mai acò nous descharjo rèn d'un pensìer tihous, qu'avèn pa manca de manifestar publicament al cours de la journado. E vaqui: li temps chaminen, la vido evouluciouno, presento proublemo e besouns nouvels, l'ecounoumìo e li raports saucials dèven se counfrountàr emé de noves fourmes de ideoulougìo e de enterpretacioun de la vido. Ma l'acioun prouvençalo evoulouciouno tambèn? se pauso à frount di proublemo generals de la vido soucialo? tiro à menar soun ativeta dins un engajament realisti de l'ome, counsidera à nivèl poupulari?

   Perqué la culturo, desbrancha de tout acò, arrisco de devenir un souvenir precious e noble, pa mai qu'acò.