S'astô, su la basoure, su l'u dla porte,
culhî lâ flours flurìa dint un prà,
béure l'aigue dzalô que 'l velh batsô nou porte,
pouzô la tète sla faude qu'ouz astimà...

Baizô lou piëls frizô d'un minarot,
s' vìoutô d' matin din l'erbe trempe d' rouzô,
santô su'l fen ratlà e c'mà un lhaurot
coure !est e libbre per bocs e tèra e prô...

Tsantô a pléne vou enché qu'ou sôhi rauts,
mindzô d'grouzèlla e aprê aguée 'l dzensilh,
anô, c'mà un moutoun lòurt, a dreit e a gautse,
pasô la vitte aboù la fenne e un filh.

Mindzô lou gofri astà dapè 'l fouhìa,
pilô, calhetta e trufa en cantità,
béure un dumèi a l'ostou en coumpagnia
fô douâ partia a tresèt e a l'icartà...

Sagnô 'l courin e fô 'l festin en familhe,
mountô planot la drôie e la tsarìëre,
argardô 'l sìël e vée Magnaut qu' lèi brilhe,
fô 'l gran mouscieu cant vèude ée la satsìëre!...

E pèi s' fô prenne din 'l voi dla fantazìa
e anô d'isì e d'ilôi boù l'imprescioun
qu' la vitte sôi pâ si brùtte e 'l mount entìa
boù 'l moure en l'ère icoute votre belle tzansoun...