La pouesìa qu'ou scoutàss pè ourà i ist tuta pièna d'ricord. Ricord d'un tenss qu'ou smìet lougn, ma que ou l'ist mac dré dal nòstess spàless. I ist, counfrountàndla avè sàlla d'prìmma, la diferènssi tra douess épouquess, sàlla d'ourà e sàlla que tanti d'nouss ou l'an vivù e que forse ou l'avrìount ancoù djòi d'rivìvri un bòt.

 

E I' primess nìvouless ou spuìntount an sièl,

Ou m'vìgnount an mant, una pr'una

tàntess bèless tchòsess, couma d'an vèl.

 

Tanti ricòrd, ricòrd d'àouti tenss

qu'ou fant rivìvri lou nòstou passà.

Tanti ou sount bèli, ma que gravatènss,

tanti ou sount brut, qu'est mièi desmentià.

 

Véou un bèl troup d'magnà allà a scòla.

Un pàira d'sòcou ou l'ant an ti pé.

D'bosc una gròssa cartèla a tracòla,

lèst mé d'foulàt: ou l'ant gnun pansé.

 

Cand que d'outun e s'fasìt la prouvìsta

d'pan d'sèila tou l'trìfouless par tou l'invèrn,

dj'alliàn a ou fouòrn e, an bèla vista,

mindjiàn lou pan tchàoud, berlicàndse li dè.

 

Più grant da invèrn, alliàn an pasqué.

Fasiàn tanti djeu, ampariàn a sounà.

Alliàn an mascràda e bin voulenté

tchantiàn Martina a ou tenss d' Carlevà.

 

Lou Carlevà e ièret la fèsta più bèla.

Tre dì d'baldòria, tra squerss e alegrii.

Poulènta counsa a ou Dimàrtess e a la sèira

tuti a balà, an bouna coumpagnìi.

Mascràdess, bràndou, lou djeu dou basin

bal d'la ramàssi, couriandouless an tèsta.

Par quèrquess ouress li nòsti sagrìn

da part lassiàn, par gòdri la fèsta.

 

Lou dì d'Pasquàtta alliàn fàri marènda,

fìess e fil tuti an sèmbiou, an bouna armounìa.

Tchantiàn, souniàn, balliàn la courènda,

mindjiàn e buviàn, tou tanta alegria.

 

A la Trinità, a Sant'Ana e Mesòst,

prountíàn lou bal, prepariàn la frascà,

an t'un djeu d' bòtchess, an t'n'àiri,

an t'ou qu'i avit un bèl post par balà.

 

Balliàn s'la tèra, ma a nouss e nou smièvet

d'èssi in una splèndida sala da bal.

La nòsta semplice musica i dounàvet

djòia e allegria, bele si souniàn mal.

 

Bèli ricòrd, qu'ou nou djùtount a vìvri

li tenss d'ourà, an t'ou que tout est finì.

E srit tant bèl d'pouié un dì ancoù diri:

Dj'en fàit na fèsta e s'sèn divertì.

 

Certo que l'càress memòriess d'si tenss

ou sount lou ricòrd d'san qu'dj'en perdu.

Douess tchòsess souless dj'aviàn, lou bountènns

E la più splèndida, la djouventù.