Tot es interdit…

Es plan luènh l’eslogan de 1968: «Es interdit d’interdire». E mai particularament als Estats-Units. Dempuèi qu’es arribat al poder, lo president-monarca (e sa còlha) sortisson cada jorn decrets, mesuras e decisions segon lor bon voler o lo quartièr de la Luna, en se trufant coma d’una figa de las règlas del jòc democratic e de las relacions internacionalas.

- L’interdiccion d’unes libres dins las escòlas es ja una practica dins unes Estats republicans: la tièra dels libres tirats d’unas bibliotècas escolaras s’alonga, s’alonga, s’estira e s’espandís! Quauques exemples: L’arrapa-còrs (Salinger), Los rasims de la colèra (Steinbeck), De mirgas e d’òmes (P-A. Bertola), Lo melhor dels mondes (Huxley), Farenheit-451 (Bradbury), La crida de la sèlva (Jack London), Per qual tinda lo clas? (Hemingway), Huckleberry Finn (Mark Twain), 1984 (Orwell), Los nauts de Brama-Vent (Emilia Brontè), Volada a l’en-sús d’una nisada de cocuts (Kesey), Bonjorn tristum (Francesa Sagan), Lo malaut imaginari (Molière), Harry Potter (Rowling), Autobiografia (Malcom X), Sebelís mon còr a Wounded Knee (Dee Brown), De sang-freja (Truman Capote), Irange mecanic (Burgess), los policièrs de Stephen King…! Atal, son per milierats los libres tirats de las bibliotècas… Ne sèm pas mai a 1984, mas a 1985!

• ONG: Va èsser complicat per una ONG de contunhar de reçaupre finançaments americans dins la mesura ont lor i cal respondre positivament a un questionari en 36 punts que li demandan causas plan evidentas per lor ròtle dins la societat e de per lo monde : pas aver de projècte sus l’equitat e la diversitat ; pas de projècte sul climat o la justicia environamentala; apòrt menat al budgècte e a l’influéncia dels USA ; pas question d’egalitat de genre e d’inclusion ; respècte o pas del dreit internacional e de lors institucions; afirmacion que lo projècte menat es dirigit contra China; luta contra l’immigracion illegala cap als USA; suènhs aportats a omosexuals; pas seguir las nefastas organizacions internacionalas coma ONU e OMS; … I a tanben una question rapòrt a lor contribucion a l’expleitacion dels minerals rares…

- Pingoins: Dins la tièra dels païses penalizats per las taxas, se trapan las illas australianas d’Heard e MacDonald qu’an dreit a un modèste 10 % mas que sos sols estatjants son de pingoins!

- Los mots interdits: La tièra dels mots e expressions interdits d’usatge dins la comunicacion estatala americana es espantanta. S’i trapa (tièra non limitativa): femna, inclusion, diversitat, LGBT, andicap, egalitat d’accès als suènhs, sèxe, identitat de genre, discriminacion, egalitat, egalitat sociala, equitat, exclusion, justicia sociala, marginalizat, minoritat(s), opression, prejudici, privilègis, jos-estimat, jos-representacion, estereotipes, traumatisme, black, latino-a, comunautat d’originas divèrsas, pertinéncia culturala, comunautat indigèna, antiracisme, gòlf de Mexic, diversitat etnica, minoritat ispanica, persona negra, raça e etnia, racisme, segregacion, activisme, antiracistas, institucional, plaidejar, politica, dominat pels òmes, feme, victima, crisi climatica, cambiament climatic, qualitat environamentala, energia pròpra, pollucion,… Totes los documents que pòrtan un d’aqueles mots an dreit a la disparicion 404 not found. E i pòt pas aver copia d’aqueles documents, vist que lo mot carbonaes tanben interdit. Pas mai de sòuses pels universitaris qu’estudiarián lo climat, lo feminisme, la diversitat etnica... Dins l’escampatge de mots dels sistèmas informatics volgut per la novèla administracion americana, se trapa lo mot gay, vist que cal pas mai parlar d’omosexualitat. Consequéncia: disparicion dels documents sus la bomba d’Iroshima que l’un dels avions que la lancèt portava lo nom d’una femna que se disiá Elona Gay! Devi çaquelà notar e saludar lo punt grandament positiu de las mesuras del president Trompeta: a pas (encara) interdit lo mot «Paratge»!