franco-provenzale
Ënt ël valadë ou sount istaië mëntunuvë ël fèstë quë la trëdisioun è nouz’eu dounà.
Për ezempi ën toutë é trai ël valdë ou sount nhint alà përdù li quërlévà trëdisiounal, onhiduna a to ël souë caratéristiquë diferent é përticular. Ma sittë ou sount nhint ërz uniquë fèstë, n’èn gro d’aoutrë, nhint mëc viëi, ma ëd co neuvë a to la muzica, li bal é tènta joi ëd trouvasë é diletase ënsembiou.
Mërguitta è i eu apéina finì ëd fa ël prëvë ëd li bal, avé lou soun amis Mërtin.
Mërtin: “Sta dimèngi è i eu la fèsta Pëtrounal a Mizinì é sta sèira j’alèn tuiti a balà, t’a fait lou ripas ëd tui’ li pas … t’è bèlë prounta”
Meurguitta: “Sëi propi gro criéouza ëd scoutà sto group neu, ma përtechipèn a touta la fèsta… j’ai propi joi …”
Tui’ hl’an la fèsta doou Patroun è vint ourganizaia da li prieu, dui prieù é douë prioirë. La dimengi matin a la Mëssa granda ou partechipet tou’ lou pais é ël prioirë ou portount ëd sëstin piën ëd pën ëntrésia é decourà, chamà li galët, da dounà a tuiti për ërcourdà la fèsta. Finìa la Mëssa é benedì li pën, la muzica, ëdvant a la gezia, è sounet mentre ël prioirë ou distribuesount li galët.
Subit dopou dinà, li prieù, coumpanhìa da la muzica, ou font ëlz “oubadë”: ou font lou gir ëd tou’ lou pais: ëdvant a onhi us la muzica è sounet diversë courendë é mëc li prieù ou peuvount balà. A la fin d’onhi ezibisioun ou pìount d’ofertë da dounà a la gèzia é a la fèsta. Mëc can quë la “prouchesioun muzical” è i eu fait tou’ lou gir é è aruvet ën piasi, ëndoua li prieù ëd l’an ou prezentount li prieù ëd l’an qu’è vint, parèi ou ‘s balount trai courende ën ounour ëd li “viëi” prieù é trai për li neu. Mëc alëra lou bal ou i ëst duvért a tuiti fin dopo meza noit.
A la nostra Mërguitta è restet nhint quë countinouà a balà për prountase për la fèsta.