Coumme l’ èi jò divou, moun pari l’ at de betie; ou l’ at fèit lou muradour corra l’ avat d’ arengé la meizoun; ou boun a fare lou menuzié è in poc lou frìe, ma luì, coumme meitìe l’ at chuzì de travalhé la tèra, dounque i-t' in ome de campanha.
Din sëtti darìe an, incò eisì an mountanha, se travalhe avei de maquine coumme lou tratour, la falchatris, l' ambalatris, è lou blà se meisonne pa pì a mon.
Onca l' eitrablo ou mecanizà: ièt lou nastro traspourtatour e la maquina per mouze.
L’ avèn de vache da chèrt è lou lèit nou sert per anlevé li vel è carca col fazèn de toumme freiche per nouzooutri.
Moun pari, qu'ou travalhe asì le vinhe, l’ at voulù prouvé de noueve coultivasioun que in col se faziòn pà, coumme ad esemplo l' at plantà d' ompie, d' ambrune, d' oulivi, de frole.
Pèr le frole i t’ ità nechesari fare de sèrre avéi in amplont pèr éiguele.
Pèr venderlé mielh ou-t intrà din inna coperativa.
Le oulive, le culhit cazi neire, corra i soun pa tont moure è le porte a pité din in mulin spré pèr farnen l' olho. Le ooutre, le leise mouré è apré le bitte dzot sal. Le ompie, le ambrune è le frole i creisoun ben din li boc de notra zona è li oulivi soun servajo sut le roche a mezjorn.
Din lou chooutén, corra moun frari Serafin vei a largé, mi è me souere alèn arbaté d’ erbe è de flou, de sëlle que se vendoun, coumme lou serpolh, lou gineivro, le marve, lou roumanin. Tot sèn iou pourtèn a inna erboristeria è se ganhèn carca sordi.
In col, se pouvat arbaté le vioulëtte, l' arnica, le rei coucoùc, lou genepì è li narchizi.
Varra i prouibì perquèn a n'ièt papì ton.
Le coultivasioun plut ampourtonte soun sëlle de la frita è de la vis. De frita l' avèn de pruss , de poumme, de quivi, de chatinnhe, noueize, doulanhe è mandolle; anveche de choouténh l' avèn de sireize, de pèrsie è de prune. Le vis, apré in baroun de travalh, nou dounoun de reizin pèr fare de vin è pèr mingé asì d' inver, coumme pendòla. |
